طريقة كتابة المقالات بنظام المجموعات

السلام عليكم

هاشرح في الموضوع هنا طريقة كتابة المقالات بنظام المجموعات.

نظام المجموعات معناه إن الكاتب بيستلم مجموعة متشابة من المقالات يجب كتابتها، وهنا بتظهر بعض المشاكل معاه منها إن المقالات متشابهة جدا ودا بيخلي الكتابة صعبة، ولكن قبل ما أبدأ في شرح طريقة الكتابة - هاكتب نبذة مختصرة مهمة جدا للناس البعيدة شوية عن مجال الانترنت ماركتنج والسيو.

أي موقع أونلاين بيبقى مستهدف بعض الكلمات الدلالية اللي عاوز يعمل رانك فيها في جوجل. مثلا احنا في موقع قمرين مستهدفين كلمات كتير، على سبيل المثال "تبييض الوجه" دي كلمة دلالية إحنا مستهدفينها في الموقع وعاوزين نعمل فيها رانك.

يعني إيه تعمل رانك في كلمة دلالية؟

يعني لما حد يبحث في جوجل ويكتب "تبييض الوجه" يلاقي الموقع بتاعنا رقم1

يعني إيه كلمة دلالية؟

الكلمة الدلالية دي مش عنوان. الكلمة الدلالية عبارة عن مصطلح معين (يعني مش شرط يكون كلمة واحدة، ممكن يكون كذا كلمة) تم الإجماع البحثي عليه من فئة معينة من الناس. يعني لما أقولك إن "تبييض الوجه" دي كلمة دلالية يبقى لازم تعرف إن فيه عدد من الناس (عشرات، مئات، آلاف، ملايين) بيكتبوا نفس الكلمة الدلالية دي بالظبط (بمعنى بالظبط - يعني نفس الحروف).

إيه الخطوات المتبعة مع الكلمة الدلالية؟

طيب، قولنا إن مثلا "تبييض الوجه" دي كلمة دلالية، واحنا مستهدفينها، وعليها مثلا 20 ألف باحث شهري عالمي، بمعنى إن جوجل بيشهد شهريا البحث عن "تبييض الوجه" في محرك البحث بتاعه من كل بلدان العالم 20 ألف مرة. وقولنا إن إحنا عاوزين نطلع رقم 1 في البحث في جوجل ونتغلب على ملايين الصفحات والمواقع اللي بتكتب في نفس المجال وعن نفس الكلمة الدلالية (متخيلين صعوبة المنافسة) فهل فيه خطوات معينة إحنا كأصحاب مواقع بنعملها عشان نقدر نتغلب على المنافسة دي في الكلمة دي ونطلع رقم 1؟ أكيد، وهنا هاذكر البعض منها اللي يهمني إن الكاتب يفهمه.

1- كثافة الكلمة الدلالية في الموقع

دي لو الكاتب فهمها هايفهم ليه هو بياخد كلمات متشابهه. لو افترضنا إن موقع أيمن فيه 5 مواضيع عن "تبييض الوجه"، وموقع يوسف فيه 100 موضوع عن "تبييض الوجه"، وأيمن عاوزه موقعه (أو موضوع معين في الموقع) يطلع رقم 1 في الكلمة الدلالية "تبييض الوجه"، وبردو يوسف عاوز نفس الشئ. تفتكر بديهيا يعني جوجل هايخلي موقع مين يطلع رقم 1 في السيرش؟ أكيد طبعا موقع يوسف، ليه؟ لأنه متخصص أكثر في الكلمة الدلالية بدليل إن عنده 100 موضوع عن الكلمة الدلالية.

دا معناه إن أي صاحب موقع لما بيستهدف كلمة دلالية معينة لازم يكتب فيها مقالات كتير جدا على نفس الكلمة! ولو افترضنا انه بيتعامل مع 20 كاتب وهو عاوز 1000 موضوع عن الكلمة الدلالية، يبقى كل كاتب هايكتب 50 مقالة عن نفس الكلمة!

وهنا بتظهر المشكلة، إني لما ببعت لحد مجرد مقالتين متشابهتين أحس إن القيامة قامت :) وبليز عاوز مقالة تانية، وأنا كتبت مرة في الكلمة الدلالية دي مش هاعرف أكتب تاني، وهلم جرة :)

الحل؟ مافيش عصاية سحرية، الحل إن الكاتب (يتصرف) ويكتب بدل المقالة 50 عن نفس الكلمة الدلالية! ويعرف إن هو كاتب محتوى مواقع مش باحث في أصول الفقه! أقصد إنك بعملك ككاتب أو كاتبة أونلاين يبقى لازم تعرف طبيعة المجال قبل ماتقول أنا عاوز أكتب، وطبيعة المجال هي التشابه الصارخ للمواضيع والمقالات لو بتشتغل مع موقع معين لفترة طويلة.

طيب إزاي نكتب 50 موضوع عن كلمة دلالية واحدة! مبدئيا مافيش عصاية سحرية في الموضوع بردو، أنا بعد شويه هاشرح طريقة بديهية لأي عاقل إنه يتصرف إزاي، ولكن دي مش الطريقة الوحيدة لكتابة المجموعة (ال50 مقالة) وممكن حضرتك أو حضرِتك تكتبي بنظام مختلف مادام هاتقدري تطلعي ال 50 مقالة، بس خلينا نكمل الخطوات المتبعة مع الكلمة الدلالية ونقول رقم2.

2- كثافة الكلمة الدلالية في الموضوع

ودي فيها مدارس كتير، أنا هاقول هنا اللي يتناسب مع طبيعة شغلنا واللي إحنا محتاجينه. أيمن ويوسف كتبوا موضوع عن "تبييض الوجه"، أيمن ذكر الكلمة الدلالية "تبييض الوجه" مره واحدة في المقالة كلها! يوسف ذكرها 5 مرات، تفتكر جوجل هايخلي مين يطلع في السيرش أكتر؟ أكيد مقالة يوسف لأن جوجل شاف إن الكلمة الدلالية اتكررت 5 مرات في المقالة، يعني واضح إن المقالة متركزة كويس على الكلمة الدلالية.

عصام كتب مقالة عن "تبييض الوجه" وذكرها 5 مرات بردو زي يوسف ولكن، ذكر 8 مشتقات من الكلمة الدلالية كمان، أمثال

(الوجه الأبيض، تبييض قوي للوجه، لجعل الوجه أكثر بياضا، تنعيم الوجه وتبييضه، إلخ)، تفتكر جوجل هايخلي مقالة مين تظهر أكتر في السيرش وفرصتها في احتلال المركز الأول في السيرش تزيد؟ أكيد مقالة عصام، لأنها مش بس ذكرت الكلمة الدلالية بقدر كافي، دا كمان ذكر مشتقات وكلمات قريبة شوية من الكلمة الدلالية، وبما إن جوجل روبوت وبيعرف يقرأ ويقارن مش يفهم، فهو أخد باله إن فيه مشتقات للكلمة الدلالية في مقالة عصام أكتر، وبالتالي جوجل بيفهم إن عصام مقالته أكتر تفصيلا وتركيزا عن مقالة يوسف وبالتبعية أيمن.

أضيف إن جوجل كمان لو وجد إن نسبة الكلمة الدلالية كتيرة جدا بدرجة غير منطقية بيعتبر دا سبام وبيعاقب الموقع، يعني موضوع اتكررت فيه الكلمة الدلالية 30 مرة مثلا! أكيد دا واحد بيهزر وكاتب كلام غير عقلاني عشان يوهم جوجل إنه مركز على الكلمة الدلالية، وهنا جوجل بيعاقب موقعه فورا وبيخسر كل حاجه.

طبعا ممكن الكلمة الدلالية تتكرر 30 مره وجوجل مايعاقبش الموقع، دا في حال كانت المقالة 5000 كلمة مثلا مش 1000، بمعنى - فيه نسبة معينة لعدد مرات تكرار الكلمة الدلالية مقارنة مع عدد كلمات المقالة ككل، في الغالب نسبة 1% : 3% تعتبر مقبولة، وفيه مواقع بتحسبلك نسبة كثافة الكلمة الدلالية في مقالتك كام بالظبط، تقدر تبحث عنها أونلاين.

طيب، بالنسبة لشغل المجموعات، إيه هي الطريقة اللي ممكن تكتب بيها المجموعة؟

لو انت معاك 7 مواضيع عن مشتقات الكلمة الدلالية "وصفة لتبييض الوجه"، وهانفترض إن دي المواضيع المطلوب الكتابة عنها:

وصفة لتبييض الوجه بسرعة

وصفة لتبييض الوجه بسرعة فائقة

وصفة لتبييض الوجه في يوم

وصفة لتبييض الوجه في اسبوع

احسن وصفة لتبييض الوجه

وصفة تبييض الوجه بالبيض

وصفة لتبييض الوجه بالزيوت

خلونا نشوف إزاي نقدر نقسم الكتابة في المقالات دي.

نظام سهل وعملي لتقسيم مقالات المجموعات

1- هانستبعد آخر موضوعين من التقسيمة، ببساطة لأنها كلمات يونيك أو فريده، يعني مش شبه الباقيين، موضوع البيض هاتركز على وصفات فيها البيض للتبييض مثلا 60% من المقالة، ودور مكونات البيض في التبييض مثلا 20%، وبعض النصائح مثلا 20% من المقال. لاحظ إن جسم الموضوع بيتكلم عن دور البيض في التبييض ولذلك لازم من 60% ل 80% من المقالة يتكلم عن دور البيض وخلطاته في التبييض، وفي حالتنا احنا هانكتب 60% خلطات البيض و 20% معلومات عن البيض، يعني اجمالي 80% عن البيض ودوره وخلطاته في التبييض. لأن بعض الكتاب آسف بيستهبل ويكتب 20% عن خلطات البيض و 80% عن نصائح وحاجات برا جسم الموضوع خالص! وبيزعل لما برفض المقالة!

بردو تبييض الوجه بالزيوت هانستبعدها لأننا هانتكلم عن الزيوت فقط (طبعا لازم نجيب أكبر قدر من الزيوت نتكلم عنها، لكن لو مافيش غير زيت او اتنين فمضطرين نكتبهم هما بس ولكن نستفيض في الشرح قدر الامكان - وبردو مانخرجش عن الكلمة الدلالية ونكتب نص المقالة نصائح وكلام فاضي لملء المقالة - هاتترفض)

2- عندنا حاليا 5 مواضيع، وواضح إن مافيش أي سمة مميزة لأي مقالة فيهم عشان نستبعدها ونقول (دي هانركز فيها على كذا) عشان نطلعها برا المجموعة - بمعنى إن ال 5 دول هما فعلا فعلا نفس الكلام المفروض يتكتب! نعمل ايه؟

أولا هانعمل بحث شامل عن الوصفات، وشامل بمعنى شامل، يعني مثلا لو قدرنا نجيب 15 وصفة لتبييض الوجه يبقى احنا كدا حلينا المشكلة. ليه؟ كل موضوع من ال 5 هانكتب فيه عن 3 وصفات بس وبكدا يبقى احنا حلينا المشكلة. ويبقى صيغة الموضوع (3 وصفات مشروحة بالتفصيل 60% من المقال - دور بعض مكونات الوصفة في تبييض الجلد 20%- نصائح ومعلومات وخلافة 20%).

3- طريقة تانية، اننا نكتب 4 وصفات في الموضوع، 3 يونيك و1 متكرر، ولكن، المتكرر دا لازم يعمل ليه إعادة صياغة، يعني تكتب الوصفة الرابعة بأسلوب مختلف. وطبعا مش نفس الوصفة هاتكررها في المواضيع كلها لأ، كل وصفة تكررها في موضوعين (مع إعادة الصياغة ها؟) وهكذا.

4- ممكن نعمل حاجه كمان، استخراج وصفات مشتقة. يعني لو عندك وصفة من ال 15 وصفة عن الليمون والدقيق، اكيد لو بحثت فقط عن الليمون ممكن تلاقي وصفة بالليمون بس، وممكن تلاقي وصفة بالليمون والدقيق وعنصر تالت زي صودا الخبز، وممكن تلاقي بالليمون والدقيق فقط ولكن بطريقة مختلفة عن الطريقة الأصلية بتاعتك. يعني لو اجتهدت انك تطلع من كل وصفة كمان واحدة مشتقة، أصبح عندنا 30 وصفة بدل 15!

5- الإلتزام بكثافة الكلمة الدلالية؟ أوعوا تكونوا نسيتوا، موضوع "وصفة لتبييض الوجه في يوم" لازم المصطلح على بعضه يتكرر على الأقل 4 أو 5 مرات في المقالة بتاعته، في حين إن موضوع "وصفة لتبييض الوجه في اسبوع" هانكرر نفس المصطلح 4 أو 5 مرات. يعني الموضوع الأول اتكررت في كلمة ".... في يوم" والموضوع التاني اتكررت فيه كلمة ".... في اسبوع" واخدين بالكم؟

نفس الشئ، الفرق بين "وصفة للتبييض" و "خلطة للتبييض" إن الموضوع الأول هانركز على تكرار كلمة "وصفة" والموضوع التاني هانركز على تكرار كلمة "خلطة"

نفس الشئ في موضوعين عن "وصفة في المنزل" و "وصفة في البيت"، تمام؟

ركزوا على الكلمة الدلالية يا جماعة (في التكرار والبحث) بنفس الحروف والكلمات، لأن مثلا 1000 واحدة بتبحث عن وصفة، و1000 واحدة تانيين خالص بيبحثوا عن خلطة، دول بيشوفوا مقالة ودول بيشوفو مقالة تانية، فلو انا بعت لحضرتك موضوعين "وصفة للتبييض" و "خلطة للتبييض" وانت ركزت على كلمة وصفة في المقالتين، أصبح عندي مقالة مافيهاش كلمة خلطة! يعني مش هاتنافس في الكلمة الدلالية "خلطة للتبييض"! فاهمين؟ يارب.

عموما دي الطريقة البديهية للكتابة في مقالات المجموعات.

6- النظام دا أسهل من الكلمات المختلفة، لأن حضرتك ببساطة هاتعمل سيرش مرة واحدة بس، أه سيرش مكثف شوية ولكن هايتعمل مرة، وهاتكتب عليه كمية مقالات كبيرة. عكس الكلمات المختلفة، كل كلمة بتعمل ليها سيرش لوحدة، ودا بيعطل الوقت كتير للكاتب.

7- في ملف تكست واحفظ روابط المصادر بتاعتك لنفسك، لان ممكن تتفاجئ بعد مجموعتين تلاته عن "تسمين الخدود" " تبييض الأسنان" أرجع أبعتلك مجموعة عن "تبييض الوجه" تاني! فلو انت مش فاكر المصادر اللي كنت كاتب منها هاتضايق وتتعب. لازم تحفظ المصادر عشان تفكرك انت كتبت منين، وعشان بردو ماتكتبش منها تاني وتبقى عارف ان المصادر دي أصبحت مستهلَكة، هات غيرها.

8- لما تكون الكلمة الدلالية مثلا "كريم للتبييض" أو "وصفة للتنعيم" ماتجبش كريم واحد او وصفة واحدة! اكتب عدد عادي جدا بس قول في اول كريم ان دا هو افضل واحد، وفي اول وصفة ان دي هي افضل واحدة، واذكر الباقيين تحتها عادي جدا

9- العنوان يكون الكلمة الدلالية فقط! ماتكتبش عنوان من دماغك

بعد كدا أي تنبيه بدل ما أبعته لكاتب كاتب من وقت للتاني، هاعمل بيه موضوع في البلوج هنا وأبعته للكل، ولو حد ليه أي استفسار يسألني وأنا تحت أمره.

(خدت بالكم الخاتمة صغيرة ازاي مجرد سطر ! الناس اللي بردو آسف بتستهبل وتكتبي مقدمة 10 سطور وخاتمة 10 سطور عشان ياكل نص المقالة في كلام فاضي! بقولهم منكم لله :) )