طريقة تنسيق الموضوع والفقرات في موقع قمرين

السلام عليكم

كل موقع وبيتم الإتفاق فيه على نظام معين في التنسيق وشكل عام للمقالات، وإحنا في موقع قمرين متفقين على نظام محدد يجب الإلتزام بيه أثناء نشر المقالة على الوردبرس. في الموضوع دا هوضح شكل التنسيق المطلوب، عموما أنا عملت فيديو يوتيوب بيوضح الطريقة ولكن هاعيد توضيح بعض النقاط اللي ماتكلمتش عنها بإستفاضة في الفيديو.

أولا محرر الوردبرس الجديد Gustenberg واللي تم إعتمادة رسميا من قبل وردبرس - محرك رائع جدا، تقريبا بيديك كل اللي انت محتاجه ككاتب. أنا عارف إن فيه ناس مازالت بتفضل المحرر القديم، ولكن الحقيقة إن المحرك القديم ماكانش ثري بالإضافات المتنوعة اللي بيوفرها المحرك الجديد، ولكنه كان عملي شوية بسبب البساطة. ولكن كتير من أصحاب المواقع كان بيلجأ لتنصيب محررات أخرى لإضافة خواص مهمة ماكانش المحرر القديم بيوفرها. لكن الجوستنبيرج الحمدلله حل المشكلة ووفر كل شئ. خلونا نبدأ ونتكلم عن النقاط الهامة اللي محتاجينها في تنسيق مقالات قمرين.

ديباجة الخلطات

موقع قمرين موقع بيتكلم عن الجمال وبيركز أكتر على الطرق الطبيعية للعناية بجمال المرأة، وبالتالي بيركز أكتر على إستخدام الخلطات والوصفات الطبيعية. وبما إن 80% من محتوى الموقع بيتكلم عن الوصفات الطبيعية فكان لازم يكون فيه ديباجة (نظام أو ستايل) معين في كتابة الوصفة موحدة في جميع المواضيع.

نبدأ بالخطوات الهامة لكيفية كتابة ديباجة المقالات

أولا حجم الخط

الوردبرس في جميع إصداراته بيوفر تقريبا 6 أحجام مختلفة من الخطوط اللي هي بالعربي"ترويسة". لما تيجي تكتب عنوان بيظهرلك حجم الخط اللي انت عاوزة، وبتلاقي الأوبشنات دي "H2  H3  H4  H5" علما بإن H2 دا أكبر خط، وH3 خط أصغر، وH4 خط أصغر أكتر، وهكذا.

دا معناه إني لو عندي عنوان رئيسي ومنفرد منه 3 عناوين فرعية، يبقى بديهي جدا إن العنوان الرئيسي هايكون H2 أكبر خط، والعناوين الفرعية هاتكون H3 خط أصغر. وتحت H3 حاجه من الإتنين، يا إما هاتكتب فقرة (والفقرة هي صاحبة الحجم الأصغر ومالهاش رقم H) ويا إما تحتاج تكتب عناوين فرعية تاني. كدا العناوين الفرعية اللي تحت ال H3 هاتكون بحجم إيه؟ بالظبط هاتكون H4، ولو احتجنا نعمل تحتهم عنوان فرعي رابع هايبقى بحجم H5 وهكذا.

مثال

عنوان رئيسي H2

عنوان فرعي H3

عنوان فرعي فرعي H4

عنوان فرعي فرعي فرعي H5

مثال عملي

زي مانتم شايفين، عندنا عنوان رئيسي كبير "أفضل 10 ماسكات وطرق للقهوة للشعر" ودا حجمه H2

هايندرج تحته 10 عناوين فرعية، ال 10 عناوين هايكونوا H3 يعني بحجم أصغر، ودا اللي واضح في أول عنوان فرعي اللي هوا "1- ماسك زيت الزيتون والقهوة لتغذية الشعر"

وبعدين احتاجنا نكتب عنوان فرعي فرعي اسمه "مكونات الماسك" ولذلك خليناه H4 ولو احتاجنا نعمل عنوان فرعي تحته هايكون H5

طبعا التنسيق دا أو طريقة الكتابة عموما هي بالظبط اللي محتاجينها، خصوصا سطر الفقرة المكتوب تحت العنوان الرئيسي اللي هو "يمكن استخدام ماسكات القهوة للشعر التي....الخ"

بمعنى، ياريت تحت العنوان الرئيسي نكتب سطر أو اتنين نشرح شوية معلومات فيه - قبل ما نبدأ في عرض العناوين الفرعية.

ثانيا معلومات العنوان

دي مهمة جدا لأي كاتب أونلاين، عارفين المقالة اللي فاتت اتكلمنا عن تكرار الكلمة الدلالية في الموضوع عدة مرات بمشتقاتها ومدى أهمية دا في تحسين المقالة أمام جوجل. بنضيف هنا إن أهم تواجد للكلمة الدلالية لازم يكون في عنوان الموضوع نفسه. يعني لو الموضوع عن تبييض الوجه، هل ينفع عنوان المقالة أصلا مايكونش فيه كلمة تبييض الوجه؟ أكيد لأ. ولذلك تواجد الكلمة الدلالية في عنوان الموضوع هو أهم حاجه.

تاني أهم تواجد للكلمة الدلالية بيكون في العناوين الرئيسية والفرعية. وهنا بلاقي مشكلة من الكاتب، إنه مش بيكتب الكلمة الدلالية ولا حتى مشتقاتها في العنوان! ودا غلط كبير وبطلب التعديل فورا.

الكلمة الدلالية يا جماعة لازم تكون مكتوبة في العناوين الرئيسية والفرعية، عشان جوجل يعرف إن أنا مهتم فعلا بالكلمة الدلالية دي، كمان مش لازم تكون في كل العناوين لو العناوين كتيرة، يعني لو عندي في الموضوع 20 عنوان ممكن أسيب 5 بدون الكلمة الدلالية والباقي أذكر فيه الكلمة الدلالية ومشتقاتها.

مثال خاطئ لعدم تواجد الكلمة الدلالية في العناوين في موضوع عن تبييض الوجه

خلطات ووصفات

خلطة الليمون وصودا الخبز

خلطة البرتقال

خلطة اللبن

خلطة الزبادي

خلطة الخيار

المثال الصحيح لتواجد الكلمة الدلالية هو

خلطات ووصفات لتبييض الوجه

خلطة الليمون وصودا الخبز لتبييض الوجه

خلطة البرتقال لتبييض الوجه

خلطة اللبن لوجه أبيض ناصع

خلطة الزبادي

خلطة الخيار لتنظيف الوجه وتبييضه

فهمتو الفرق؟ وأخدتوا بالكم إزاي الكلمة الدلالية اتكررت في المثال التاني؟ وازاي سيبنا عنوان منهم بدون الكلمة الدلالية للتنويع؟ وازاي استخدمنا الكلمة الدلالية مرتين ومشتقاتها مرتين؟ ياريت تراجعو المثال عشان دا لازم يتحفظ عشان دا اللي عاوزينه بالظبط

ثالثا الترقيم

جوجل بيحب الأرقام، جوجل يحب عنوان "أهم 10 طرق لتبييض الوجه" عن عنوان "طرق تبييض الوجه"، مش جوجل بس، انتي كمان بتحبي العنوان الأول لأن الرقم بيديلك إيحاء جميل بالتنظيم وبالتركيز على الموضوع وبالتنوع وحاجات كتير. ولذلك العناوين لازم يكون فيها أرقام. خلينا ناخد المثال اللي فات ونقول إن فيه غلطتين.

الغلطة الأولى إن العنوان مافيهوش عدد الخلطات

الغلطة التانية إن كل عنوان فرعي مش مترقم

مثال خاطئ للترقيم

خلطات ووصفات لتبييض الوجه

خلطة الليمون وصودا الخبز لتبييض الوجه

خلطة البرتقال لتبييض الوجه

خلطة اللبن لوجه أبيض ناصع

خلطة الزبادي

خلطة الخيار لتنظيف الوجه وتبييضه

مثال صحيح للترقيم

أهم 5 خلطات ووصفات لتبييض الوجه

1- خلطة الليمون وصودا الخبز لتبييض الوجه

2- خلطة البرتقال لتبييض الوجه

3- خلطة اللبن لوجه أبيض ناصع

4- خلطة الزبادي

5- خلطة الخيار لتنظيف الوجه وتبييضه

بالله عليكم ملاحظين الفرق؟ بستغرب إن كاتب بيقول أنا بشتغل كاتب أونلاين وهو بيقدم مقالاته بدون أرقام ولا تكرار للكلمة الدلالية! دي أساسيات العمل أونلاين، وعدم الإلتزام بيها معناه إنك مش فاهم أصلا جوجل هايتعامل إزاي مع المقالة بتاعتك.

أقول حاجتين هنا

أولا العناوين الفرعية ال 5 طبعا كل واحده هاينكتب تحتها الشرح، زي الصورة اللي فوق، هايتكم فقرة بسيطة كمعلومات عن الفقرة وبعدين نعمل عنوانين فرعيين "مكونات الخلطة" و "طريقة العمل" وهايكونو بحجم H4 وتحت كل واحدة منهم قائمة منسدلة بالخطوات.

طبعا العنوان الرئيسي "أهم 5 خلطات ووصفات لتبييض الوجه" هايكون بحجم H2 والعناوين الفرعية الخمسة بحجم H3 زي ما اتفقنا، راجعوا الصورة اللي فوق بردو.

ثانيا في العنوان الرئيسي بنكتب كلمة قبل الرقم، يعني ماتكتبش " 5خلطات ووصفات لتبييض الوجه" لأ، لازم تكتب قبلها كلمة من دول (أهم أفضل أحسن أقوى ،،،) وهكذا، على حسب صيغة العنوان بتختار كلمة من دول. كمان العناوين الفرعية بتكون كدا (1- خلطة...) يعني (واحد شرطة مسافة الكلمة) عشان الناس بتكتب التنسيق دا غلط وبتعمل المسافة قبل الشرطة! لأ، المسافة بعد الشرطة.

رابعا الفواصل

محرر الوردبرس جوستنبيرج فيه 3 أنواع من الفواصل احنا بنتعامل مع 2 منهم (القصير والمنقط)

أول ما بتختار فاصل بينزل قصير أصلا، فمش محتاج تعديل، دا بيبقى بين جميع الفقران الرئيسي.

هاتحتاج تعدله تختار الفاصل المنقط لو عاوز تفصل بين الفقرات الفرعية، يعني مثلا بين الخلطات وبعضها، مش هانعمل خط عريض لأ هانعلم منقط، وهكذا.

مثال

أهمية تبييض الوجه

(فاصل قصير)

أهم 5 خلطات ووصفات لتبييض الوجه

(فاصل منقط)

1- خلطة الليمون وصودا الخبز لتبييض الوجه

(فاصل منقط)

2- خلطة البرتقال لتبييض الوجه

(فاصل منقط)

3- خلطة اللبن لوجه أبيض ناصع

(فاصل منقط)

4- خلطة الزبادي

(فاصل منقط)

5- خلطة الخيار لتنظيف الوجه وتبييضه

(فاصل قصير)

نصائح لتبييض الوجه

(فاصل قصير)

منتجات لتبييض الوجه

وصلت؟ المنقط بين الفرعيات، القصير بين الأساسيات

خامسا القائمة المنسدلة

الوردبرس بيوفر شكل للقائمة المنسدلة، لازم نلتزم بيه ومانكتبش الأرقام بإدينا

ازاي نجيب القائمة؟ من هنا

وبنختار نظام الترقيم اللي عاوزينه، نقاط أم أرقام

في الخلطات يفضل استخدام النقاط، لان الكلام نفسه بيبقى في بداية رقم أمثال ( 3 ملاعق دقيق) فلو انت أو انتي اختارتي نوع الترقيم أرقام هايبقى شكلها كدا (1. 3 ملاعق دقيق) وممكن تتفهم غلط وإن معناها ضيفي من 1 ل 3 ملاعق دقيق. ولذلك ياريت نستخدم النقاط عشان تبقى كدا (♦ 3 ملاعق دقيق) شكلها أفضل.

الكلام دا مع الخلطات بس، إنما النصائح وأي حاجه تانية ممكن تخليها أرقام عادي.

خامسا الروابط

عندنا نوعين من الروابط، روابط المصادر، ودي بتكتبيها تحت المقالة خالص عشان انا اقدر اراجعها واعرف حضرتك فعلا كتبتي من المصادر دي ولا عملتي اعادة صياغة من مقالات عربي (لأن اعادة الصياغة من المقالات العربي مرفوضة وبنوقف الشغل فورا مع الكاتب ومش بنحاسبه حتى لو كان كاتب 20 مقالة). شكل روابط المصادر بتتحط في بوكس فقرة عادي تحت المقالة، والوردبرس بيغير شكلها وبيحطها جوا بوكس روابط، بس حتى لو ماغيرش شكلها فعادي، كدا كدا انا بفتح الرابط ايا كان شكله، بيبقى بالشكل دا

النوع التاني من الروابط بيكون للمنتجات.
بصوا يا جماعة انا اللي بضيف الصور في المقالة، وبتاخد وقت ومجهود غير طبيعي، مش بس لان فيه معايير معينة للبحث ولكن عشان كمان بعيد ضغطها لتصغير حجمها. المهم العملية متعبة والمقالة بيبقى فيها من 10 ل 20 صورة أنا بضيفهم.
المشكلة دلوقتي عندي في المنتجات، مش معقول هاقعد اعمل سيرش عن منتج منتج عشان أجيب الصورة في حين إن وحضرتك بتكتبي الموضوع وبتكتبي عن المنتج - صورة المنتج بتبقى قدام حضرتك بالفعل! يعني ليه أتعب في صور المنتجات والأجهزة مادام إنها قدام حضرتك. ولذلك تحت كل منتج لازم حضرتك تحطيلي الرابط عشان أنا أجيب منه الصورة وأبدأ أحط عليها الحقوق وأضغط وأرفع.
ممكن تحطيلي رابط الصورة مباشرة، أو رابط الشراء بتاع المنتج من موقع الشراء (سوق كوم، جوميا، أمازون) عشان أخد الصورة. ولما حضرتك بتحطي الرابط تحت اسم المنتج بيكون شكله كدا

أو كدا

مقالة من غير روابط المصادر وروابط المنتجات، هاتترفض، تمام؟

سادسا الأخطاء الإملائية والتنسيقية

بجد دي كارثة. يعني بستغرب من كاتب بيكتب (علي الفور) بدل (على الفور) مش عارف الفرق بين الياء والألف اللينة، وطبعا جوجل بيترجم المقالة إن دا إسم علم (علي) مش حرف جر (على) ونروح إحنا في داهية، مقالة واحدة تتعاقب يعني حساب أدسنس يتقفل يعني الموقع انتهى! كل دا ليه، عشان كاتب بيكتب غلط!
بردو الناس اللي بتكتب (ان) مافيش في اللغة حاجة اسمها كدا، اختار (أن - إن - أنّ - إنّ) حسب الكلام.
بردو الناس اللي مش بتكتب الهمزة زي (الافضل - الادوية) فين الهمزة؟ المفروض تبقى (الأفضل - الأدوية)
بردو الناس اللي بتكتب الهاء والتاء المربوطة غلط، اسمها (الأدوية) مش (الأدويه)
بردو الناس اللي بتوجه الخطاب للذكور (قم بخلط - ضع الماسك) الخلطات دي نسائية يعني اكتبي (قومي بخلط - ضعي الماسك)
بردو الناس اللي بتكتب ورا بعضه من غير فواصل ولا نقاط! قسموا الكلام لجملّ، بين كل جملة نقطة. وبين أجزاء الجملة فواصل ،
اكتب صح يحتار عدوك فيك

سابعا النص الغير مفهوم

ودا سببه حاجه من تلاتة
أولا الكاتب ضعيف أصلا في الكتابة ومالوش في الموضوع، بنوقف شغل معاه.
ثانيا الكاتب قوي في الكتابة بس مستعجل أو غير مهتم أو غير مركز، بنوقف شغل معاه.
ثالثا الكاتب بيستعين بالنص الخارج من الترجمة! مش بنحاسبه على المقالة، وبنوقف شغل معاه.
الترجمة يا جماعة عشان حضرتِك تفهمي الكلام، لكن تعيدي كتابته وصياغته بأسلوبك.
لكن تستعيني بالنص الخارج من الترجمة نفسه؟!! غلط وممنوع نهائي، إن حضرتك تاخدي نص الترجمة كوبي بيست وتبدأي تعدليه عليه عشان يصبح مفهوم، غلط وممنوع نهائي.

ثامنا ابتعدوا عن التمارين

احنا مش موقع رياضي، لما يجي لحضرتِك عنوان "طرق تسمين الوجه" ومن ضمن الطرق بعد الحركات أو التمارين الرياضية، قدر المستطاع ابعدي عن الكتابة عن التمارين والحركات دي. لأنها هاتحتاج صور، وانا مش هاعرف اجيب ابدأ الصور بتاعت التمرين المعين دا.
ممكن تكتبي عن التمرين لو معاكي صوره من شكل التمرين، ساعتها هاتحطي رابط الصورة في الموضوع عشان انا اخد الصورة دي واعتمدها.

تاسعا عدد كلمات المقالة

عدد كلمات المقالة لازم يعدي ال 1000 كلمة. طبعا فيه ناس بتستخدم الرقم بتاع ملف مايكروسوفت ورد، مايكروسوفت ورد بيحسب الكلمات العربي غلط يا جماعة، مش بس كدا دا كمان الناس اللي بتعتمد عليه في تصحيح الأخطاء اللغوية والنحوية لاز تتوقف عن كدا فورا لأنه بردو ضعيف جدا جدا ومن كل 10 أخطاء لغوية ونحوية بيمسك 3 بالكتير!
لازم نعتمد على الرقم الموجود في الوردبرس، ونتأكد إنه عدّى ال 1000 كلمة.
ببساطة بعد ما تنقلو الموضوع في الوردبرس اضغطوا على Ctrl + A عشان تعلّموا على المقالة كلها، هايظهر في الجمب عدد كلمات المقالة

دا مثال لموضوع كان معدي ال 1000 كلمة على مايكروسوفت ورد، ولكن تحت ال 1000 كلمة على الوردبرس.
وجوجل بيعتمد ترقيم الوردبرس لأنه أدق، فلازم إحنا كمان نلتزم بيه.
ماحدش يزعل في حال وقف العمل وعدم المحاسبة على المقالات في أي حالة من الحالات اللي فوق.
بخلاف كدا، بنرحب بكل الكتاب اللي عندهم استعداد بالالتزام بالنقاط دي.
شكرا وآسف لو فيه حدة في الكلام، ولكن الشغل الأونلاين زي أي شغل، تعب ومجهود وراس مال ومجازفة ومتابعة بالسنوات، كل دا يطير في ثانية في حالة مقالة واحدة تتعاقب من جوجل! في الموضوع خطير فعلا لكن الكتاب مش واخدين بالهم من الأمر خصوصا الجداد في المجال.

مثال لمقطوعة نموذجية بدون أي أخطاء، وتحتوي على جميع التنبيهات السابقة

مثال تاني
(ونلاحظ الحاجات اللي تحتها خط أحمر)

في رعاية الله